Patay ang duha ka student-athletes sang Ateneo Men’s Basketball Team matapos malumos sa team-building activity sa Dipaculao, Aurora sang Hunyo 8.
Ginkumpirma sang Ateneo de Manila University ang insidente kag ginkilala ang mga napatay nga sanday Rene Clert Baterbonia kag Divine Adili.
Sa isa ka opisyal nga pahayag, ang unibersidad nagpabutyag sang ila pinakamadalom nga pagpakig-unong kag simpatiya sa mga pamilya, mga abyan, mga kaupod sa team, mga coaches, kag iban pa nga namatyan sang duha ka mga atleta.
Dugang pa sang unibersidad nga magapadayon sila sa pagpangamuyo para sa kalinong sang mga nagtaliwan kag kaisog sang mga nabilin.
Ang insidente nagtuga sang kakugmat kag daku nga kasubo sa unibersidad sang Ateneo, ilabi na sa college basketball kon sa diin kilala ang duha ka mga atleta nga mapisan kag dedikado nga mga humalampang.
