Ginganyat ni Batangas 2nd District Rep. Gerville Luistro ang House Quad Committee nga irekomendar na ang pagpasaka sang kaso kriminal batuk kay anay Pangulong Rodrigo Duterte bangud sa ginapahayag nga paglapas sa international humanitarian law kag kaso nga murder sa pagkapatay sang linibo ka mga Pilipino sa maduguon nga drug war sang administrasyon sini.
Base sa datos nagikan sa Philippine Drug Enforcement Agency kag human rights group, ginsambit ni Luistro nga may 6,252 nga napatay sa police anti-drug operations tubtob Mayo 2022, ksh 27,000 tubtob 30,000 ang mga biktima sang extrajudicial killings (EJK).
Ginsambit man ni Luistro ang pagkapatay sang 427 aktibista, human rights defenders, kag mga grassroots organizer tubtob sadtong Disyembre 2021; 166 land kag environmental defenders tubtob sadtong Disyembre 2020; 23 journalist kag media workers tubtob Abril 2022; 66 miyembro sang hudikatura kag abogado tubtob sadtong Disyembre 2021; kag 28 alkalde kag bise-alkalde tubtob sadtong Disyembre 2021.
Ginkumparar ni Luistro ang daku nga numero sang mga patay sa idalom ni Duterte sa halos 200 nga pagkapatay nga may kaangtanan sa droga sa idalom sang ginsundan nga administrasyon ni anay Pangulong Benigno Aquino III.
Ginpahayag ni Luistro nga si Duterte ang naglapas sa Republic Act 9851, Act Defining and Penalizing Crimes Against International Humanitarian Law.
Ang RA 9851 nga ginpatuman sadtong 2009 ang nagatalana kag nagasilot sa crimes against international humanitarian law, genocide, kag crimes against humanity, kalakip na ang mga sistematiko nga pagpamatay. Samtang ang mga drug-related nga EJK ang nakasaad sa “other crimes against humanity” suno sa gintalana sang Seksyon 6 sang layi nga nagatumod sa mga ginhungod nga pagpatay, torture kag pilit nga pagkadula.
