ROXAS CITY – Ginklaro ni Roxas City Vice Mayor Erwin ‘Nonoy’ Sicad nga wala pa nag-positibo sa coronavirus disease (COVID-19) ang isa ka babaye nga empleyado sang Office of the Sangguniang Panlungsod.
Suno sa bise-alkalde, mismo ang nasambitan nga persona ang nagpakamaayo nga ipa-confine ang iya kaugalingon sa Roxas Memorial Provincial Hospital bangud nga naglain ang pamatyag sini.
Suno diri nga nakatambong pa sa seminar ang nasambit nga persona sadtong Agosto 14, kag wala na ini makabalik sa trabaho pagka-Agosto 17 bangud sa paglain sang iya pamatyag.
Apang ginklaro ni Sicad nga wala pa sang kompirmasyon nga positibo gid ini sa nasambit nga balatian.
Sa baylo nga ipaidalom ini sa rapid antibody test, gindiretso na lamang ini nga ginkuhaan sang swab specimen para ipaidalom sa real-time polymerase chain reaction (RT-PCR) test kag ginahulat pa sa karon ang resulta.
Apisar wala pa ang resulta sang swab test sang nasambit nga persona, may mga ginhimo na nga lihok ang talatapan sang SP agud maamligan ang ikaayong-lawas sang mga empleyado.
Kalakip na diri ang disinfection sa bilog nga floor kun sa diin naba-se ang nasambit nga opisina, pagpaiway sang duty sang mga empleyado kag temporaryo nga pagsuspinde sang sesyon sang konseho.
