Ex-army, arestado matapos makuhaan sang granada sa banwa sang Dumarao

ROXAS CITY – Arestado ang isa ka 56 anyos nga anay miyembro sang Philippine Army matapos makuhaan sang hand grenade sa Barangay Alipasiawan, Dumarao, Capiz.

Ginkilala ang naaresto nga si Mamerto Jimeno, residente sang nasambit man nga lugar.

Suno sa Dumarao Municipal Police Station, nakabaton sila sang pagpanawag gikan sa concerned citizen nga nakit-an ang suspek nga may bitbit nga hand grenade kag yara sa idalom sang impluwensiya sang makahulubog nga ilimnon.

Gilayon nga nagresponde ang mga kapulisan sa lugar kag didto naaresto ang suspek.

Nakahunong na karon sa karsel ang nasambit nga suspek kag natalana nga pasakaan sang panumbungon nga paglapas sa Republic Act 9516 ukon Illegal Possession of Explosives.