UNITED STATES — Isa ka Filipino nga may green card ang gin-deport sang US Department of Homeland Security (DHS), samtang isa ka Filipina nurse naman ang gindakop kag gin-detain sang immigration authorities bangud sa nagataas nga immigration enforcement sa Estados Unidos.
Sa California, gin-deport sang DHS sang Agosto 18, 2026 ang Filipino nga masobra na sa 20 ka tuig nagatinir sa US.
Suno sa DHS, may final order of removal nga gin-isyu sang immigration judge sang Hulyo 2, 2026.
Ginkilala siya sang DHS bilang miyembro sang Asian Boys gang kag may criminal record nga nagalakip sang voluntary manslaughter, aggravated assault with a firearm kag possession of a controlled substance.
Nagsulod siya sa US bilang lawful permanent resident sang Abril 2004.
Ang iya pinakamabug-at nga kaso may kaangtanan sa kamatayon sang isa ka US Navy sailor sa San Diego freeway sang Oktubre 27, 2018.
Sang ulihi, gin-aresto ang Filipino kag nag-plead guilty sa voluntary manslaughter kag iban pa nga kaso.
Sang 2020, ginpamatbatan siya sang siyam ka tuig kag walo ka bulan nga pagkapreso.
Samtang, sa Arizona, isa ka Filipina nurse ang gindakop sang federal immigration agents sa Phoenix Sky Harbor International Airport.
Suno sa iya pamilya kag boyfriend, wala siya sang criminal record kag may valid work permit.
Legal man siya nga nagatrabaho bilang nurse sa acute-care telemetry unit sang isa ka ospital sa Phoenix antes siya gin-custody sang US Immigration and Customs Enforcement (ICE).
Suno sa update sang iya boyfriend sa GoFundMe campaign, may court hearing siya sa iya immigration case sa Setyembre 4, 2026.
Wala pa nagpagwa sang opisyal nga pahayag ang Philippine Consulate General sa Los Angeles nahanungod sa kaso.
