ROXAS CITY – Tuman ka dako ang nangin kahalitan sang fisheries sector sang naglaslas ang bagyo Ursula sa probinsiya sang Capiz sabg nagligad nga tuig.
Ini ang ginkumpirma ni Provincial Agriculturist Sylvia Dela Cruz sang ma interview sang Bombo Radyo.
Suno kay Dela Cruz nga sandig sa natipon nga report sang mga Municipal Agriculturist nagalab-ot sa P962 milyones ang kabug-usan nga nangin kahalitan sa fisheries sector.
Kalakip sa mga nahalitan ang mga punong sa diin nag-awas ang mga isda, naguba nga mga fish cages, kagamitan sang mga mangingisda kapareho sang mga sakayan, fishing gear kag iban pa.
Sa pito ka mga banwa nga yara sa coastal area kag tuman nga naapektuhan, nagapanguna ang Pontevedra nga nagalab-ot ang kahalitan sa P274milyones pesos, ginsundan sang Panay nga may P254milyones pesos nga kahalitan.
Samtang sa sektor sang panguma nagdangat sa P500 milyones ang nangin kahalitan sang amo nga bagyo.
P27mil ektarya naman sang rice crops ang apektado sa diin nagdangat sa P412 milyones ang nangin kahalitan sini.
Sa karon padayon ang pre-masterlisting ang Office of the Provincial Agriculturist agud mahibaluan kun sin-o nga mga mangunguma ang nakaangkon sang totally kag partially damage nga ulumhan.
