ROXAS CITY, CAPIZ- Nagapati ang isa ka abogado nga mahimo mapasakaan sang kaso si anay AKO Bicol Party-list Representative Zaldy Co bangud sang iya mga ginpangbuyagyag sa video nga ginpagwa sa social media.
Sa interview sang Bombo Radyo kay Atty. Joenar Pueblo, President sang Philippine Arbitration Center in the Visayas, iya ginpahayag nga mahimo mangin bala nanday President Ferdinand Marcos Jr. kag Former House Speaker Ferdinand Martin Romualdez ang mga pahayag ni Co.
Suno kay Atty. Pueblo, kun indi mag ‘take-oath’ si Zaldy Co sa iya nga mga pahayag, mahimo sya nga mapasakaan sang kaso nga ‘libel’.
Pahayag nya, isa pa sa iya ginalantaw, nahimo ni Zaldy Co nga ibuyagyag ang kinahanglan nga mabal-an sa publiko para sa kaugalingon nga proteksyon. Pananglitan nga may matabo nga malain sa iya, importante nahibaluan na sang publiko ang kamatuuran.
Ika-duha, may posibilidad nga gin-abisuhan si Co nga ibuyagyag ang amo nga mga pahayag sa paglaum nga himuon pa ini bilang state witness sang mga ginatawag nga ‘big fishes’ nga amo sanday President Ferdinand Marcos Jr. kag Former House Speaker Ferdinand Martin Romualdez.
Samtang, dugang sang natungdan, isa lang ang klaro, kabahin sang sistema sang pagpangawat sa kaban si Zaldy Co sa diin nga gin-ako man sini kag ginsiling nga ginhimo niya ang amo nga buluhaton para sa Presidente kag kay Romualdez.
Interviewed by Bombo Francis Biñas
