Ginbuyagyag sang prosecution panel sa ika-28 nga adlaw sang impeachment trial nga si former Special Envoy to China Jaime Cruz, nga nagserbe sa administrasyon ni anay President Rodrigo Duterte, amo man ang persona nga nakalista sa corporate records sang mga kompaniya nga gin-angot kay Vice President Sara Duterte kag sa iya bana nga si Atty. Manases Carpio.
Ginpahayag ni Private Prosecutor Erwin Matib matapos pamangkuton ni Senator-judge Erwin Tulfo kun si Cruz, nga gin-appoint bilang special envoy to China para sa trade and investment, amo man ang persona nga nakalista bilang incorporator ukon board member sa corporate records sang mga kompaniya nga gin-angot sa Vice President kag kay Carpio.
Nagsabat si Matib nga huo kag pareho lang nga persona.
Ginpamangkot ini ni Tulfo samtang gin-imbestigahan niya ang prosecution witness nga si Atty. Gerardo Del Rosario, director sang Securities and Exchange Commission (SEC) Company Registration and Monitoring Department.
Nagatestigo si Del Rosario may kaangtanan sa corporate records sang mga kompaniya nga gin-alegar nga may kaangtanan kay Duterte kag Carpio, lakip na ang ila mga incorporator, director kag shareholder.
Sa pagpamangkot ni Tulfo, ginsiling ni Del Rosario nga nagguwa ang pangalan ni Cruz sa corporate records sang masunod nga mga kompaniya:
City Hall King Chow Foods Corporation
Metro City Chow Foods Corporation
Great Jolly Times Food Corporation
Davao New Royal Taipan Foods Corporation
Davao Emerging Taipan Corporation
Davao Bounty Times Food Corporation
Una na nga ginpahayag ni Del Rosario sa korte nga si Cruz amo ang top subscriber sang Metro City Chow Foods Corporation, nga may 1,997 shares.
Ginsundan ini ni Vice President Duterte, nga may 500 shares.
