Aprobado na ang Ordinance No. 2-2025, Series of 2025, nga nagatukod sang Freedom of Information sa Banwa sang Panay, Capiz.
Ini kasunod sa mayoriya nga pag-apruba sang Sangguniang Bayan sang Panay sa ginpatigayon nga Regular Session.
Sa interview sang Bombo Radyo kay Vice Mayor Paolo Besa, iya ginpahayag nga sang una pa nga termino niya, ginpasar na ang amo nga ordinansa.
Suno kay Besa, tanan nga impormasyon kag mga public documents dapat bukas kag ma-access sang publiko, kag kinahanglan ihatag ini sa pumuluyo, maliban lamang sa mga datos nga protektado sang Data Privacy Act.
Dugang pa ni Besa, Importante nga mangin masangkad ang ihibalo kag pag-intindi sang mga pumuluyo angut sa mga public documents agud masiguro ang transparency kag responsibilidad sang gobyerno.
Gin-engganyo man sini ang iban nga mga LGU nga magpasa sang kasubong nga ordinansa agud mahibaluan man sang publiko ang tagsa ka mga dokumento.
