ROXAS CITY – Ginlubong kag wala ginkonsumo ang mga nakompiskar nga diwal ukon angel wings sa isa ka negosyante sa Teodoro Arcenas Trade Center (TATC).
Ini ang panindugan sang Officer-in-Charge (OIC) sang pamunuan sang City Agricultures Office nga si Mary Ann Baria sang mainterview sang Bombo Radyo.
Suno kay Baria nga sang gindala sa ila talatapan ang nakompiskar nga kapin 38 ka kilo sang diwal sa negosyante nga si Ramonita Torres, makit-an nga kasubong indi na ini mapuslan.
Bangud diri suno sa iya, ginmanduan sini si Regulatory Designated Officer Rizaldy Astrolabio nga ipanghatag sa pila ka ahensiya ang mapuslan pa nga diwal kag ilubong ang mga indi na mapuslan.
Apang suno sa iya nga ginhambalan siya ni Astrolabio nga wala na gid sang mapuslan sa diwal rason nga ginlubong niya na lamang ini tanan.
Mahibaluan nga ang nakompiskar nga mga diwal ang tuyo kuntani nga ipadala sang negosyante nga si Torres sa Kalibo, Aklan.
Apang natukiban sang administrador sang amo nga merkado publiko ang pagbaligya sini rason nga ini ang ginkompiskar.
Mahibaluan nga hugot nga ginadumilian ang pagsalom sang diwal bangud indi pa sini sang harvest season.
Sang napakig-angutan naman sang Bombo Radyo, ginpahayag sang negosyante nga si Torres nga wala siya nakakilala kun sin-o ang babaye nga iya nabaklan sang diwal.
Suno sa iya nga ginbakal niya ini sa guwa sang merkado kag gindala sa sulod agud iya man mabaligya.
Nagpanindugan ini nga wala siya sang ideya kun sa diin ginkuha kag ginsalom ang nasambit nga diwal.
