Nagpaandam ang International Energy Agency (IEA) nga ang global economy ang posible yara sa idalom sang “major threat” bangud sang krisis sa gatong tuga sang nagapadayon nga tensyon sa Middle East, partikular sa Strait of Hormuz.
Suno kay International Energy Agency Chief Fatih Birol, ang sitwasyon sa subong ang mahimo ipaanggid sa krisis sang langis sang dekada 70 kag sa epekto sang pagsalakay sang Russia sa Ukraine sang 2022.
Gintawag niya ini nga kombinasyon sang “two oil crisis and one gas crash,” nga suno sa iya may malapad nga epekto sa pangkalibutanon nga ekonomiya.
Ginhatagan man pagtamod ni Birol nga wala sang pungsod nga makalampuwas sa epekto kun magapadayon ang krisis, gani kinahanglan ang hugot nga kooperasyon agud mapahagan-hagan ang sitwasyon.
Nahibaluan nga nagapadayon sa gihapon ang tensyon sa tunga sang Estados Unidos sang AMerika, Israel kag Iran, samtang ang sitwasyon sa Strait of Hormuz nga ginakabig isa ka importante nga ruta para sa halos 20% sang mga kargamento sang langis kag gas sa kalibutan, ang nagapabilin nga apektado.
Bangud sang kinagamo sa lugar naghinay ang dalagan sang supply nga nangin kabangdanan sang pagtaas sang presyo sang langis sa merkado.
