ROXAS CITY – May yara sang bastante nga testing kits ang gobyerno-probinsiyal para sa ginapangatubang sa karon nga pandemiya bangud sang coronavirus disease (COVID-19).
Ini ang ginpasiguro sang pinuno sang Hospital Management Section sang gobyerno-probinsiyal sang Capiz nga si Alex Nolasco sang mainterview sang Bombo Radyo.
Suno kay Nolasco nga supisyente pa ang mga rapid test kits sang gobyerno-probinsiyal para sa mga locally-stranded individuals (LSI’s) kag repatriated Overseas Filipino Workers (OFW’s).
Ginpahayag pa sang opisyal nga may mga local government units (LGU’s) man sa mga kabanwahanan nga may kaugalingon nga ginbakal nga mga testing kits para sa mga nagapauli nga LSI’s kag repatriated OFW’s nga ila residente.
Ginpaathag man ni Nolasco ang mayor nga katuyuan sang rapid test nga amo ang matumod kun protektado ukon indi ang isa ka persona batuk sa amo nga balatian.
Samtang ang real-time polymerase chain reaction (RT-PCR) test naman ang may katuyuan nga matumod kun ‘active’ ang infection sang isa ka persona kun sa diin diri sa Capiz ginakuhaan sang ‘swab’ ang isa ka persona kag ginadala ini sa Iloilo para sa laboratory test.
