Nagapangabay sa gobyerno ang grupo sang mga mangunguma sang dugang nga suporta para sa mga apektado sang kakulangan sang tubig bangod sa El Niño nga na-eksperyensyahan sa pungsod.
Sa interview sang Bombo Radyo kay Lucia Capaducio, Chairperson sang Pamanggas, iya ginpahayag nga daku ang epekto sang kakulang sang tubig para sa mga mangunguma, ilabi na sa patubas sang ila mga pananom.
Suno kay Capaducio, yara lamang sa lima ka porsyento ang mapuslan sa ila nga patubas nga mga pananom, gani kinahanglan sang mga mangunguma sang ayuda kag iban pa nga suporta halin sa gobyerno.
Ginpahayag man sini nga daku nga bulig sa mga mangunguma ang mga drone nga halin sa gobyerno nga nagabulig sa pag-spray sang ila mga pananom.
Nagalaum naman ang natungdan nga mahatagan sang nagakaigo nga bulig ang mga mangunguma agud mahagan-hagan ang ila nga kapierdihan bangud sa El Niño.
