ROXAS CITY – Ginpatpat sang Provincial Election Supervisor sang Commission on Elections (COMELEC) – Capiz ang mga guidelines ukon pagsulundan sa pagsugod sang campaign period buwas nga adlaw para sa Barangay kag Sangguniang Kabataan Elections (BSKE) sa Oktubre 30.
Sa interview sang Bombo Radyo kay Atty. Wil Arceño, suno diri sandig sa ginpaguwa nga COMELEC Resolution kinahanglan ang mga posters, tarpaulins kag individual posters sang mga kandidato ang indi maglapaw sa sukat nga 2x3ft, mahimo lamang makagamit sang daku nga tarpaulin kun magahiwat sang ‘kawkus’ ukon campaign rally.
Kinahanglan may yara man sang nakasulat sa tarpaulins sang ‘paid for ukon paid by’, pananglitan nga wala ini sang nakabutang makonsiderar ini nga illegal campaign materials.
Nagakadapat nakabutang ang tarpaulins sa common poster area kasubong sang plaza, merkado, barangay centers, kag iban pa nga kapareho nga lugar.
Para naman sa mga magalapas nga kandidato, magapadala ang poll body sang Notice to Remove kag Show Cause Order.
Magapatigayon man sang Oplan-Baklas ang COMELEC-Capiz sa mga campaign materials nga nakapaskil sa mga indi otorisado nga lugar sumugod Oktubre 20 tubtob Oktubre 27, 2023.
Ginadumilian man ang paghatag sang kuwarta, pagkaon, tubig, ballers, tshirts, kalo, noodles, lighter, makahulubog nga ilimnon kag iban pa nga may balor sa ‘kawkus’ ukon house-to-house campaign.
Suno kay Arceño, ang nasambit nga pagkabutang ang makabig vote buying kag klaro nga paglapas sa COMELEC rules.
Pagpunto sini, ang tagsa ka mga kandidato ang allowed maggasto lamang sang P5 sa kada botante, pananglitan matukiban nga nag-overspend ang kandidato pinaagi sa gindeklarar nga Statements of Contributions and Expenditures (SOCE) ini ang magaresulta sa subject for disqualification.
Samtang, ginapahanugutan naman ang pagpangampanya sa telebisyon, radyo, newspaper, internet, ukon social media sa idalom sang regulasyon kag guidelines sang COMELEC kag ginpahanumdum nga likawan ang online libel.
Wala man ginadumilian ang paggamit sang campaign jingles apang ginapangabay ni Arceño nga mangin responsable sa pagpatukar sini kag sundon ang oras agud indi maka-istorbo sa mga pumuluyo.
Nagalaum si Arceño nga subong nga piniliay mangin malinong kag matawhay ang matabo nga eleksyon.
