ROXAS CITY – Nagdangat sa masobra P300-M, ang halit nga tuga sang El Nino Phenomenon sa probinsya sang Capiz.
Sa interview sang Bombo Radyo kay Ms. Sylvia Dela Cruz Provincial Agriculturist , ginpahayag sini nga sa ila ginpatigayon nga emergency meeting kaupod ang Provincial Disaster Risk Reduction and Management Council (PDRRMC) kag iban pa nga ahensya nakasugtanan nga ipaidalum na sa State of Calamity ang probinsya sang Capiz bangud sa nasambit nga phenomenon nga gina-atubang sa karun.
Suno kay Dela Cruz, dako nga halit sang tag-ilinit ilabi na sa mga mangunguma nga nagtanum sang ila mga produkto nga kadam-an wala mapuslan bangud sa kakulangan sang suplay sang tubig sa mga pananum.
Ginpahayag man sini nga sa ila ginpatigayon nga survey nagabase sila sa standing crop sang pananum ukon ang nagtanum lamang subong nga season kung sa diin naapektuhan sang El Nino.
As of May 22, naglab-ot sa 6,048.06 hectares out of 50,000 hectares lamang ang nagtanum kung sa diin sa nasambit nga numero 4,357.06 ang naapektuhan ukon 5,154 nga mga mangunguma sang palay.
Bangud sini, naglab-ot sa masobra P200-M ang kahalitan sa palay.
Pag-abot naman sa standing crop sang mais yara sa 1,996.44 hectares out of 14,000 hectares sa probinsya ang nagtanum kung sa diin ang apektado yara sa 1,656.6 hectares.
Ang kabug-usan nga total nga halit sa mais naglab-ot sa masobra P3-M.
Ang pagpaidalum sang State of Calamity sa probinsya, nakabase kung bala naglab-ot na sa masobra 50% ang apektado sa nasambit nga phenomenon.
Ginpahayag man ni Dela Cruz nga magluwas sa palay kag mais naglab-ot naman sa masobra P15,000 ang balor nga halit sa high value commercial crops ukon mga utanon.
Sa kabug-usan yara sa masobra P300-M ang halit tanan sa agrikultura.
