ROXAS CITY – Nadakpan sang Station Drug Enforcement Group sang Roxas City PNP ang ginakabig high-value target drug personality nga si Baldwin Chua, 38 anyos sang San Roque St., sa ila operasyon sa Blk 1, Sunshine Village, Barangay Banica sining siyudad.
Nakuha sa paghinakop ni Chua ang 37 tanan ka mga sachets sang ginapatihan shabu nga ginabulubanta nagabug-at sang 60 gramos, tatlo ka mga shotgun, isa ka .45 cal pistol kag mga drug paraphernalia.
Suno kay Roxas City PNP chief PSUPT. Luther Lugo III, madugay na nila nga ginamonitor ang mga iligal nga aktibidad ni Chua apang subong pa lamang nila ini natiyempohan.
Ini ang labing una nga operasyon sang Roxas City PNP batuk sa iligal nga droga matapos ang masobra isa ka bulan sang ginsuspendir ang pulisya sa pagpatigayon sang anti-drug operations.
