Ginhilway na sang Hamas ang 3 pa ka bihag nga Israelis subong nga adlaw sang Sabado, Pebrero 15.
Pasado alas-10 sang aga, local time, ginhilway na sang militante nga Hamas ang 3 ka bihag nga Israelis halin sa Khan Younis sa Gaza kag ginturn-over sa Red cross antes gindala ang mga ini sa Israeli army sa iba nga lokasyon sa Gaza.
Ang Israeli military naman ang nagdala sa mga ginhilway nga Israelis papauli sa Israel.
Kalakip sa mga ginhilway nga Israelis amo nanday Alexander Troufanov, Yair Horn kag Sagui Dekel-Chen.
Ang paghilway sa Israeli hostages ang kabaylo sang pagpapaguha naman sa masubra 360 Palestine prisoners nga nakakulong sa mga presohan sang Israel.
Matandaan nga nauna nga nagpamahog ang Hamas nga indi nila pagbuy-an ang mga bihag nga Israelis kasunod sang mga paglapas suno sang Israel sa ceasefire deal.
Nagpamahog naman ang Israel nga kun indi pagbuy-an ang mga bihag subong nga adlaw, ipadayon sini ang pag-atake sa Gaza.
