Nagapanawagan ang mga public health advocates sa Kongreso nga ipatuman ang buwis nga indi magnubo sa P80 sa mga vape products agod ma-discourage ang paggamit sini, ilabi na sa mga pamatan-on, kag malikawan ang mas daku nga gasto sa ikaayong lawas sa palaabuton.
Suno sa Healthy Philippines Alliance (HPA), upod ang HealthJustice, indi pa bastante ang ginaduso nga P72.93 nga unified tax rate pagsulod sang 2027 para sa sigarilyo, heated tobacco products (HTPs), kag vapor products.
Ang rate ginrekomenda sang Department of Finance (DOF) kag Department of Health (DOH).
Suno kay Dr. Jaime Galvez Tan, lead convener sang HPA kag anay Health Secretary, indi dapat pagpanumdumon nga wala peligro ang vaping bangud mahimo ini makahatag sang seryoso nga epekto sa ikaayong lawas sang mga pamatan-on.
Nagpahayag man sang pagpamatok ang HealthJustice sa mga ginaduso sang pila ka mamalidha nga panubuon ang vape tax tubtob P15 kada milliliter.
Suno kay Atty. Benedict Nisperos, legal adviser sang HealthJustice, mahimo nga mangin mas barato kag mas madali ma-access sang mga pamatan-on ang nicotine-containing vape products kun panubuon ang buwis.
Ginpahayag man sang grupo nga walo sa 11 ka ASEAN countries ang nagadumili na sang vapor products, samtang ginatugutan pa ini sa Pilipinas sa idalom sang Republic Act 11900, ukon Vaporized Nicotine and Non-Nicotine Products Regulation Act.
