Ginalantaw sang IBON Foundation nga preparado ang mga sabat ni hostile witness Gina Acosta, anay special disbursing officer sang Office of the Vice President, sa ika-17 nga adlaw sang impeachment trial ni Vice President Sara Duterte.
Sa interview sang Bombo Radyo kay Mr. Sonny Africa, Executive director sang IBON Foundation, iya ginpahayag nga posible nga gin-coach si Acosta sang mga abogado ni Duterte bangud palareho lang ang iya sabat apang sa pihak sini, may mga sabat sa gihapon ang testigo nga nagatum-ok sa bise presidente nga may kahilabtanan sa pagpagwa sang kwarta kag sa mga transaksyon nga ginakwestyon.
Suno kay Africa, indi dako nga issue ang mga kaladlawan nga mga pangalan nga yara sa acknowledgement receipts sa baylo mas importante ang mga dokumento nga makapamatuod sa mga ginpaguwa nga kwarta kag kun may matuod nga transaksyon ukon aktibidad nga nagakonekta sini.
Pahayag niya, bilang authorized special disbursing officer, nagakadapat nga may yara sang training kag ihibalo si Acosta sa mga proseso sa pagpagwa sang pondo sang gobyerno.
Apang kun nahibaluan ni Acosta ang insakto nga proseso kag ginlapas ini bangud sa mando sang iya mas mataas nga opisyal, diri mahimo maipit si Vice President Duterte.
Ginpahayag ni Africa nga ang pinakaimportante nga pamangkot indi nga kun nakahibalo si Acosta sa proseso, kundi kun gin-override ukon ginlapas ang proseso bangud sa mando sang iya boss.
