ROXAS CITY – Hustisya ang ginasinggitan sang pamilya ni Ian Mark Baduya matapos ginbuno-patay sang Oktubre 21 sa Railway St. Barangay Punta Tabuc, Roxas City.
Sa interview sang Bombo Radyo kay Ethel Baduya, iloy sang biktima, iya ginpahayag nga ginkakibot sini ang balita nga ang iya bata ang ginbuno nga nagresulta sang iya kamatayon.
Dismayado ini matapos nga nahibaluan nga wala sang may nagbulig sa iya bata pagkatapos nga ginbuno ini ni Roger Aguirre sang makalima ka beses gamit ang ice pick.
Suno diri, masakit para sa iya bilang isa ka iloy, nga wala sang residente nga luyag maghatag sang impormasyon natuhoy sa matuod nga natabo sa insidente.
Pahayag sang iloy nga sumugod sang nakapamana si Ian, tumalagsahon na lang ini magpauli sa ila sa banwa sang Pontevedra bangud naga-istar na ini sa Sitio Quarry, Brgy. Tanza kaupod ang iya duha ka kabataan kag asawa nga nagabusong.
Aminado si Ethel nga anay drug surrenderee ang iya bata apang wala ini sang ihibalo kun nagbalik ini liwat sa iligal nga aktibidad.
Nagapanawagan naman ini sa suspek nga magsungka na sa kapulisan kag magkooperar sa imbestigasyon agud mahatagan sang hustisya ang kamatayon sang ila bata.
