PONTEVEDRA, CAPIZ – Pormal na nga nagsumiter sang nagakaigo nga complaint ang iloy nga ginareklamo ang tuman ka mahal nga pagpanukot sa paggamit ambulansiya kag sala nga findings sang doktor sang Bailan District Hospital sa talatapan sang Hospital Management Unit (HMU) sang Kapitolyo-Probinsyal.
Kaundan sang ginsumiter nga complaint sang ginang ang pagbayad sang P1,500 sa nurse nga nag-upod sa pasyente kag P3, 500 sa ambulansiya apang wala sang may gin-issue nga resibo.
Nahibaluan nga naaksidente sa motorsiklo ang anak sang ginang sadtong Disyembre 24, 2019 kun sa diin napilasan ang ulo sini rason nga gilayon gindala sa nasambit nga ospital.
Gin-refer ini sa Western Visayas Medical Center sa siyudad sang Iloilo bangud suno sa doktor na-fracture ang ulo sang iya anak.
Apang, nakibot na lamang ang ginang sang nagguha ang findings sang doktor sa Iloilo nga napak-ad lamang ang panit sang ulo sang bata.
Sa karon nagpasalig ang pamunuan sang HMU sa pagpanguna ni Dr. Alex Nolasco nga magapatigayon sang imbestigasyon kag ila ipatawag ang pamunuan sang Bailan District Hospital agud makuhaan man ang ila bahin.
