ROXAS CITY-Padayon nga ginaimbestigahan sang Sapian Municipal Police Station ang iloy nga responsable sa paghaboy sa lapsag nga nasapwan nga wala na sang kabuhi sa idalom sang payag sa Sitio Talingting Barangay Poblacion sa nasambit nga banwa.
Suno kay Police Master Sergeant Wilmer Peral, imbestigador sang Sapian Municipal Police Station nga wala sila sang may nabaton nga report nga may yara sang nadula nga lapsag sa nasambit nga banwa.
Ginpahayag sini nga sandig sa ila pagpangusisa,wala man sang may nagabusong sa nasambit nga lugar.
Gindugang pa sini nga posible ginhungod sang iloy nga ihaboy ang lapsag bangud wala pa makakas ang pusod sini.
Ginapatihan sang mga kapulisan nga posible nagikan sa iban nga lugar ang nasambit nga lapsag kag gin-anod gid lamang ini sang tubig.
Matandaan nga nasapwan ni Ramel Aldea ang nasambit nga lapsag sa idalom sang payag samtang papuli na kuntani sa ila nga balay.
