Hustisya ang ginasinggitan sang pamilya ni 2025 Palarong Pambansa “Mr. MVP” Rene Clert Baterbonia matapos ini ang malumos sa team-building activity sa Ateneo de Manila University sa Dipaculao, Aurora sang Hunyo 8.
Suno kay Rovelyn Baterbonia, iloy ni Rene, indi pa maathag sa ila ang detalye sang training camp bangud sa pagdumdom sini regular lamang nga basketball training ang pagahimuon sang iya bata sa Baler, Aurora.
Dugang pa ni Rovelyn, nagpadala pa sang mensahe si Rene antes ang biyahe kag ginpahibalo nga indi na siya makagamit sang iya cellphone sa sulod sang isa ka semana nga training camp.
Apang, nakibot nalang sila sang nakabaton sang tawag nga nalumos ang ila anak.
Bangud sini, nagapanawagan ang pamilya sang mas madalom nga imbestigasyon agud mahatagan sang kasanag ang natabu.
Base naman sa inisyal nga imbestigasyon sang Philippine National Police Regional Office 3, ginpahayag nga gin-anod sang mabaskog nga balod ang mga biktima samtang nagapaligo kag nakadto sa mas madalom nga tubig.
