Gina-imbestigaran subong sang Philippine National Police (PNP) ang posibilidad nga ang natabo nga pagpamutos ukon “shooting incident” sa Senado basi pa ginplano ukon staged lamang.
Suno sa PNP spokesperson nga si PBGen Randulf Tuaño, wala pa sila nagapahayag nga tinuod gid ukon indi ang alegasyon nga gin-setup ang insidente, kag ginatutokan nila ang tanan nga posibleng anggulo sa imbestigasyon.
Isa sa ginatan-aw sang mga imbestigador amo ang indi normal nga kataas sang trajectory sang mga bala, nga ginakonsidera nga importante nga ebidensya. Ginpahayag nga ang forensic examination ang makahatag sang klaro nga sabat kun ang mga bala naghalin sa sulod ukon sa guwa sang building.
Ginmanduan man ang tanan nga personnel nga yara sa lugar sang insidente, lakip na ang mga security forces, nga magpa-paraffin test para ma-check kun may kahilabtanan sila sa pagpabuto.
Samtang, ginpa-igting sang PNP ang seguridad sa palibot sang Senado kag ginadugang ang mga pulis nga nagabantay sa lugar matapos ang insidente.
May isa man ka empleyado sang NBI nga gin-aresto may kalabotan sa insidente, apang ginpahayag sang NBI nga wala sila sang deployed agents sa Senado sang natabo ang pagpamutos.
Ginsiling man sang mga otoridad nga ang Office of the Sergeant-at-Arms sang Senado ang nag-report nga ang ila personnel nagbalos lamang sang pagpabuto.
Ang insidente natabo samtang may mga isyu pa ukon posibleng arrest warrant batok kay Senador Ronald “Bato” dela Rosa nga gin-isyu sang ICC may kalabotan sa war on drugs sang administrasyon ni Duterte.
Ginkumpirma man nga si Dela Rosa wala na sa Senado matapos siya makit-an nga naghalin sa lugar sang madaling adlaw.
