Nag-withdraw na si Senadora Imee Marcos sa Alyansa Para sa Bagong Pilipinas nga gin-enderso sang iya nga utod nga si President Ferdinand Marcos Jr.
Sa isa ka pahayag, ginsiling ni Marcos nga indi niya mahimo nga mangampanya kag magtapak sa isa ka stage kaupod ang iban pa nga mga katapo sang Alyansa.
Ginapahayag nga ibuyagyag niya ang iya preliminary findings sa masunod nga mga inadlaw, nga suno sa iya maathag nga nagapakita nga ang administrasyon ni Marcos naghimo sang mga tikang nga kabaliktaran sa iya panindugan kag prinsipyo
Kun matandaan, sa ginhiwat nga hearing sang Committee on Foreign Relations sadtong Marso 20 ginpili sang mag-utod nga Remulla nga sanday Interior and Local Government Secretary Jonvic Remulla kag Justice Sec Jesus Crispin Remulla nga magpa-ukoy kag gamiton ang ila nga executive privilege sang hinyuhon sa ila nga i-eksplekar ang mga detalye angut sa kinahanglan nga paghinun-anon sa natabo sa tunga ni Presidente Marcos kag iya nga mga miyembro sang Gabinete antes paman ang pag-aresto kay Duterte.
Gin-athag ni Jonvic, nga ginhiwat ang pagsinapol agud lamang istoryahan ang mga huring-huring angot sa pag-aresto sa anay presidente, apang indi agud planohon ini.
Ginpanindugan ni Marcos, daw kaangay nga ginatago ang mga importante nga kamatuoran sang mga tiglawas sang gobyerno sa hearing sang Senado.
Ang hayag nga pagtabon sang krimen suno sa iya ang nagpabaskog lamang sang pagduda nga basi nalapas ang Konstitusyon kag nabuhinan ang aton soberanya bangud sa pagdakop kay Duterte.
Bangud sini, nagdeklarar si Imee nga magapabilin ini nga independent kaangay sang iya ginahambal humalin pa sang pagsugod sang election season.
