ROXAS CITY – Ginsug-alaw sang hublag protesta sang mga sidewalk vendors kag miyembro sang hugpong transport Capiz ang una nga adlaw sang implementasyon sang Sidewalk ordinance sa syudad sang Roxas, matapos nagtipon sila sa atubang sang Roxas City hall agud mapalab-ot sa gobyerno ang epekto nga natuga sa ila nga palangabuy-anan sang nasambit nga ordinansa.
Bitbit ang mga placards nga may nakasulat nga ”Gutom ang dala sang ordinansa sa palangabuy-anan sang mga vendors” kag ”anti poor”, nagsindi sang kandila nga korte krus ang mga rallyista para ipakita sa city government ang kabudlay nga dala sang ordinansa sa kabuhi sang mga ordinaryo nga tawo.
Suno sa spokesperson sang grupo nga bukas sila nga makigdayalogo kay Mayor Alan Celino para personal nga mapab-ot ang ila nga sentimyento sa nasambit nga ordinansa.
Ginpasiguro man sini nga ila dalhon sa city hall ang ginabaligya nga mga produkto para didto ibaligya kun indi pagpamatian sang gobyerno ang ila nga pag-apelar nga ipauntat ang pagpatuman sang sidewalk ordinance.
