Gamay ang tsansa nga maaprubahan ang interim release ni former President Rodrigo Duterte, suno sa isa ka legal expert.
Sa interview sang Bombo Radyo kay Atty. Gilbert Andres, isa ka accredited lawyer sang International Criminal Court (ICI), iya ginpahayag nga ang interim release kapareho sang bail ukon pyansa apang wala ini nakabase sa kwarta kundi ginahatag lamang kon mapamatud-an nga inosente ang isa ka detainee sa kaso nga ginapangatubang.
Suno kay Atty. Andres, agud nga maaprubahan ang ang isa ka interim release, kinahanglan ang isa ka detainee ang indi flight risk, indi makahimo sang bisan anong international crime, kag indi makadistorbo sa nagapadayon nga imbestigasyon.
Pahayag pa niya, sa kaso ni Duterte mabudlay para sa Pre-Trial Chamber ang paghatag sang interim release bangud sa mga ginpresentar nga rason nga posible siya nga magpalagyo, may tsansa nga pagatandugon sang iya kampo ang mga witness, kag basi makahimo liwat sang krimen bangud sang political alignment sang anay presidente.
Samtang,sa pag-evaluate sang “fitness to stand,” isa ka legal nga termino kag indi medical, kag kinahanglan mapamatud-an nga may kapasidad ang akusado nga maka-intindi sang iya rights sa proceedings sa idalom sang Rome Statute.
Dugang pa sang natungdan,ang Pre-Trial Chamber ang may final decision sa interim release kag ang tanan nga biktima may yara sang kinamatarong mabatian ang kamatuoran sa crime against humanity nga padayon nga gina-imbestigahan sang sang International Criminal Court.
Interviewed by: Bombo Chris Jan Lozada via Zona Libre
