ROXAS CITY, CAPIZ- Ginpakigbahin ni Mr. Raymundo Martinez, Administrator sang Philippine Red Cross Capiz Chapter ang importansya sang International Humanitarian Law Celebration.
Sa interview sang Bombo Radyo kay Martinez, iya ginpahayag nga ang nasambit nga selebrasyon ang gintalana sa bulan sang Agosto.
Suno sa iya, ang International Humanitarian Law, isa ka importante nga kasugtanan nga nagatuyo nga maghatag proteksyon sa mga sibilyan, mga napilasan nga suldado, kag iban pa nga apektado sa armado nga away.
Bilang kabahin sang okasyon, nagapatigayon sang mga forum, diskusyon, kag mga aktibidad ang mga lokal nga organisasyon kag ahensya sang gobyerno agud mas mapalapad ang ihibalo hanungod sa mga pagsulundan sang International Humanitarian Law. Kalakip na diri ang mga tikang agud mabuligan ang mga biktima sang mga gyera kag ang mga kalakaran sang mga kasugatanan agud malikawan ang sobra nga kapintasan sa panahon sang mga giyera.
Pahayag pa ni Martinez, ang IHL indi lamang isa ka teknikal nga layi; nagaserbe man ini nga giya agud siguruhon nga apisar yara sa tunga sang giyera, may yara ini sang proteksyon kag respeto sa kabuhi sang tags-tagsa.
Nahibaluan nga sa subong nga tuig, nakasentro ang mga aktibidad sa pagpalapad sang ihibalo hanungod sa protection of civilians kag prohibition of the use of certain weapons sa mga giyera. Ginpakita man ang mga paghanas kag seminar agud mabuligan ang mga law enforcement agencies, sundalo, kag iban pa nga mga sektor nga malikawan ang mga paglapas sa IHL.
Dugang pa ni Martinez nga pagselebrar sang International Humanitarian Law nagaserbe nga pahanumdom sang pagkinahanglan sang pagbinuligay sang mga pungsod agud mapaayos kag mapakusog ang mga mekanismo sang IHL sa bug-os nga kalibutan.
Interviewed by Bombo Francis Biñas & Bombo Sunnie Mae Batencila
