ROXAS CITY – Totally burned ang isa ka balay nga human sa light materials sa Barangay Banica, Roxas City.
Ang nasunog nga balay ginapanag-iyahan ni Sherlymaine Marcelo sang nasambit nga lugar.
Suno sa bata sang tag-iya nga si Mark John Marcelo nga posible naggikan ang kalayo sa kusina kun sa diin nagluto pa ang iya nga iloy sang wala natalupangdan nga hinali na lamang nga nag-ibwal ang kalayo samtang yara na sila nagapungko sa sala sang ila nga balay.
Bangud diri, posible nga may nabilin nga baga sang kalayo sa kusina kun sa diin naghalin ang kalayo.
Gilayon naman nga nagresponde ang Roxas City Fire Station apang natupok na sang kalayo ang balay kag wala na sang may nasalbar nga gamit.
Sa karon nagapadayon ang imbestigasyon sang mga katapo sang Roxas City Fire Station sa nagluntad nga sunog.
