Patay ang driver, samtang pilason naman ang angkas matapos aksidente nga bumunggo ang ginasakyan nga motorsiklo sa poste sa may bahin sang Barangay Matagnop, Dao, Capiz.
Ginkilala ang driver kay alyas “Toto”, 17-anyos, samtang ginkilala naman ang backrider kay alyas “Lex”, 25-anyos kag lunsay mga residente sang Barangay Ilas Sur, sa nasambit nga banwa.
Sa pagpakig-angut sang Bombo Radyo kay PSSg. Gavin Gonzales, Imbestigador sang Dao Municipal Police Station, ginpahayag nga samtang ginasubay sang nasambit nga mga persona ang dalanon papuli kuntani sa ila nga puluy-an, hinali nalang ini nga nadulaan sang kontrol sa pagmaneho sa kurbadahon nga bahin sang dalan sa lugar rason nga aksidente ini nga bumunggo sa konkreto nga poste.
Bangud sa makusog nga impact, nag-angkon sang pilas sa ulo ang driver kag pilas naman sa tuo nga nawong ang naangkon sang backrider.
Gilayon naman ini nga gin-respondehan sang mga katapo sang Dao Emergency Response Unit kag ginpadapatan sang pauna nga pagbulong antes ini nga gindala sa Dao District Hospital, apang gindeklarar nga dead on arrival sang doktor nga nag-atendir.
Base sa imbestigasyon, yara sa impluwensya sang makahulubog nga ilimnon ang amo nga mga persona.
Sa karon, nagapadayon pa ang imbestigasyon sang kapulisan angut sa nasambit nga insidente samtang, yara na sa isa ka punerarya sa amu nga banwa ang bangkay sang biktima.
