IVISAN, CAPIZ – Isa patay samtang ginabanta masobra 20 ang nagkalapilasan matapos gin-arado sang 10-wheeler truck ang masobra 20 nga mga salakyan sa banwa sang Ivisan.
Ginkilala ang biktima kay Maricel Sargento, isa ka street sweeper kag residente sang Poblacion Sur sa nasambit nga banwa samtang ang driver sang truck ang ginkilala kay Ryan Bengan Molato, 39-anyos nga residente sang Brgy. Tarong, Carles, Iloilo.
Suno sa bana sang biktima nga si Ronald Sargento, nagahilibion nga ginsaysay sini ang natabo kun sa diin bag-o lang sila dul-ong sa ila bata sa eskwelahan kag igadul-ong niya kun tani ang iya asawa sa banwa agud mag-duty apang hinali lang nag-overtake sa ila ang ten wheeler truck rason nga natumba sila sa motorsiklo kag nahulog ini sa tuo nga bahin samtang ang iya asawa sa nawala nga bahin kun sa diin nalapakan ini sang truck nga gintunaan sang kamatayon.
Sa inisyal naman nga imbestigasyon sang Ivisan Municipal Police Station, nagikan sa norte nga bahin sang Iloilo ang truck nga may dala nga construction supplies kag padulong ini kun tani sa Kalibo, Aklan apang pag-abot sa Sta. Cruz, Ivisan ginapahayag nga nadulaan ini sang preno rason nga ginpang-arado sini ang mga kasugata nga salakyan tubtob sa merkado sa nasambit nga banwa.
Suno diri nga sa masobra 20 nga nagkalapilasan, 9 diri ang gindala sa ospital lakip na ang isa nga napatay.
Samtang sa 28 ka mga nagkalain-lain nga salakyan nga naulamid, ginabanta nga 14 ang motorsiklo, 7 ka mga traysikol, 1 ka ebike, 2 ka jeepney, 1 ka pick-up, 1 ka kotse, 1 multicab kag 1 ka trisikad.
Sa karon padayon pa ang imbestigasyon sang mga kapulisan angut sa natabo nga insidente.
Priso naman sa Ivisan PNP si Molato kaupod ang mga pahinante sini.
