ROXAS CITY – Ginakabig nga kadalag-an sang isa ka estudyante nga mapasidunggan sang Borres Youth Leadership Institute (BYLI) bilang isa sa mga awardees sang 8th Batang Capiznon Awards Search for the Ten Outstanding Student of Capiz (TOSOC).
Isa sa mga awardees amo si Adrian Nazrene C. Bitoon, residente sang Barangay Vizcaya, Pres. Roxas, Capiz kag nagaeskwela sa Feliciano Yusay Consing National High School.
Sa interview sang Bombo Radyo kay Bitoon ginpahayag sini nga daku nga kadalag-an ang nabaton sini nga pasidungog kun sa diin madamo ang nagdayaw sa iya partikular na ang iya nga pamilya.
Suno kay Bitoon nga antes niya nalab-ot ini nga kadalag-an madamo pa ini sang mga naagihan.
Kalakip na lamang ang paghatag sang oras sa iya pagtuon kag suporta man sang iya mga mentors kag pamilya.
Apang, wala gid ini nag-untat tubtob nga indi niya malab-ot ang iya nga handum para sa iya kaugalingon.
Dugang pa sini nga nagabakas gid siya sa pag-eskwela agud sa ulihi mabaylohan niya ang kabudlay nga ginahatag sang iya nga ginikanan.
Samtang, nagpanugyan naman ini sa mga kabataan kag estudyante nga mag-eskwela sang maayo bangud wala sang imposible sa tawo nga nagabakas sang ensakto.
Nagpasalamat man ini sa mga tawo nga nagbulig sa iya agud malab-ot ang nasambit nga handum.
