Ginkumpirma sang Israel nga gin-igo sini ang duha ka nuclear facilities sang Iran pila ka oras pagkatapos nga nagpaandam nga palaparon sini ang ila mga pag-atake batuk sa Islamic nga pungsod.
Suno sa Atomic Energy Organization sang Iran, ginpuntirya sang pag-atake ang Shahid Khondab Heavy Water Complex sa Arak kag Ardakan yellowcake production plants sa Yazd Province.
Wala naman nagtuga sang casulaties ang pag-atake kag wala sang pamahog sang kontaminasyon.
Nahibaluan nga ang planta sang Arak nangin indi aktibo halin sang ginsalakay ini sang Israel sang nagligad nga Hunyo, samtang ang yellowcake production plant isa ka concentrated form sang uranium pagkatapos nga ginkuha ang mga higko gikan sa raw ore.
Samtang, gilayon nga nagpamahog ang Iran nga magbalos, kon sa diin ginpahayag ni Iranian Foreign Minister Abbas Araghchi nga magabayad sila sang “mabug-at nga pagtimalos” para sa mga krimen sang Israel.
Sang ulihi, gin-anunsyo sang Iran nga ang ila pag-atake nag-igo sa military base sang Amerika sa Saudi Arabia.
Ang pag-atake sang Iran sa Prince Sultan Air Base nagtuga sang pilas sa 10 ka mga tropa sang Amerika, duha diri ang grabe suno sa duha ka opisyal sang Estados Unidos.
Nahalitan man ang pila ka mga refueling aircraft sa pag-atake.
