Nagpatigayon ang Israel sang “preemptive strikes” batuk sa Iran, suno kay Israeli Defense Minister Israel Katz, kadungan sang pagdeklara sang state of emergency sa bug-os nga pungsod.
Pahayag sang opisyal, kasunod sang preemptive strike sang State of Israel batuk sa Iran, ginalauman ang gilayon nga pag-atake sang mga missile kag drone batuk sa Israel kag sa mga sibilyan sini.
Gin-report sang Iranian state media nga pila ka pagsigabong ang asud-asod nga nabatian sa kapital sang Tehran, samtang padayon nga nagainit ang tensyon sa rehiyon.
Isa ka opisyal sang Estados Unidos ang nagpahayag nga wala sang direkta nga partisipasyon ukon bulig gikan sa US sa mga ginhimo nga pag-atake sang Israel sa sulod sang Iran.
Ginkumpirma man sang isa ka Israeli official nga pila ka beses nga nagsinapol ang National Security Cabinet sang Israel bilog nga gab-i antes ang opensiba.
Samtang, ginsarado na sang Israel ang ila nga airspace tubtob sa masunod nga abiso, suno sa Ministry of Transportation sang pungsod.
Ang amo nga panibag-o nga military attack ang nagbutang sa rehiyon sa katalagman kag ginalauman ang mga posible nga pag-atake gikan sa Iran bilang balos.
