Roxas City – Kapin sa 3,000 ka mga Jamindanganon ang nakaagom sang libre nga training program sang Technical Education and Skills Development Authority (TESDA).
Suno kay Capiz TESDA Director Engr. Abdel Bakhri Hajan nga tuyo nila nga malab-ot ang tanan nga mga kabanwahanan sa Capiz para madala ang libre nga mga programa kag mahanas ang mga pumoluyo.
Nahibaluan nga ginlunsyar sining karon lang ang Capiz Training Outreach Program (CapizTOP) sa banwa sang Jamindan.
Nagpakigbahin sa nasambit nga programa amo ang mga Indigenous People, PWD’s, Kasambahay, drug surrenderers kag mga estudyante sang Jamindan National Highschool.
Kabahin sa ginpatigayon nga isa ka adlaw nga training ang tuhoy sa Computer Literacy-Photoshop, Basic Housekeeping, Aircon Cleaner, Basic Hilot, Basic Emergency, Response, Rug Making Cooking, Baking, kag Basic First Aid nga may lakip nga Dengue Awareness.
Nahibaluan nga ang banwa sang Pontevedra, Ivisan, Sigma kag Jamindan ang apat ka mga banwa nga nangin benepisyaryo sang CapizTOP nga nagpaidalum sa paghanas sa Technical-Vocational Institutions sa idalom sang Capiz TESDA School Association (CAPTESA).
