Ginpirmahan ni Presidente Ferdinand R. Marcos Jr. ang Judiciary Fiscal Autonomy Act nga ginalauman nga labi pa nga makapabaskog sang awtonomiya sang Hudikatura.
Sa iya pamulong-pulong, ginpahayag sang Presidente nga paagi sa bag-o lang napirmahan nga Judiciary Fiscal Autonomy Act, ang Hudikatura maga-operate sang mas epektibo kag independente.
Gin-anunsyo sang Presidente nga sa idalum sini nga kasuguan, ang ginaduso nga budget sang Hudikatura igasumiter direkta sa Kongreso kag igalakip sa national budget suno sa ginbalay.
Dugang pa sang Presidente nga sa idalum sang bag-o nga kasuguan, indi mahimo nga buhinan sang lehislatura ang pondo nga ginapain sa Judiciary.
Ang nasambit nga kasuguan nagasiling man nga ang Chief Justice may gahum sa pagdugang sang bisan ano nga butang kag pagbag-o, paagi sa isa ka en banc resolution, ang pag-alokar sang pundo—suno sa ginahatag sang kasuguan.
Suno sa Presidente, obligado ang Korte Suprema nga magreport kada tatlo ka bulan sa Executive Branch kag sa Lehislatura kun paano gingasto sang Hudikatura ang ila pundo.
Ang DBM mahimo nga separado nga magsumiter sang ila mga komento kag rekomendasyon sa budget proposal sang Hudikatura.
Lakip sa mga nakasaksi sa pagpirma sang nasambit nga layi amo ang pila ka mga katapo sang Gabinete, Senado, Kamara, kag Korte Suprema.
