Ginpakamalaut sang defense team ang desisyon sang International Criminal Court (ICC) nga ginbasura ang interim release request ni anay Presidente Rodrigo Duterte.
Nagalaum sila nga baliskaron sang ICC Appeals Chamber ang desisyon.
Isa sa mga rason kon ngaa gin-reject ang request amo ang mga pahayag ni VP Sara Duterte tuhoy sa ginaalegar “pagluwas” sa iya amay gikan sa prisuhan sa The Hague.
Ginsambit man sang korte nga ginaalegar ginhambalan ni Duterte ang iya bata nga luyag niya nga magbalik sa Davao City kon makaguwa siya, kabaliskaran sa pahayag sang depensa nga magapabilin ini sa pungsod nga magabaton sa iya.
Ginpanindugan sang ICC nga dapat magpabilin sa kustodiya si Duterte samtang ginahulat ang kumpirmasyon sang mga panumbungon sa krimen batok sa katawhan nga pagpatay may kaangtanan sa linibo nga napatay sa war on drugs.
Nahibaluan nga si Duterte ang yara sa kustodiya sang International Criminal Court sa The Hague humalin sang Marso 2025, may kaangtanan sa tatlo ka kaso sang pagpatay nga ginakabig “crimes against humanity” bangud sang iya kontrobersyal nga kampanya kontra droga sang tion sang iya administrasyon.
Matandaan nga sang Hunyo, ang iya kampo nag-file sang petisyon para sa interim release bangud sa ginaalegar indi maayo nga ikaayong lawas kag ‘not fit to stand trial.’
