Nagsaka na sa kapin 20 ang napatay sa apat ka states sa Estados Unidos sang Amerika bangud sa paglaslas sang Hurricane Helene.
Lakip sa pinakaapektado amo ang South kag North Carolina, Florida, kag Georgia.
Ginakahangaw-an nga madugangan pa ini bangud sa reports nga may mga tawo pa nga na-trap sa mga building kag may yara pa sang nagsaka sa mga atop.
Pagkatapos sang landfall bilang Category 4 hurricane sa Big Bend region sa Florida sang nagligad nga gab-i, naghina na ini subong kag isa na lang ka tropical depression.
Sa pihak sini, madamo pa nga states ang ginabaha kag may mga nag-isyu pa sang flash flood emergencies sa Southeast lakip sa Atlanta.
Masobra naman sa apat ka million nga mga balay kag mga negosyo ang na-report nga nawad-an sang suplay sang kuryente sa Florida, Georgia, South Carolina, Tennessee kag Virginia kag posible nga sinemana pa ang ilawig antes mabalik sa normal ang suplay.
