ROXAS CITY – May persons of interest na ang kapulisan sa nagluluntad nga pagkinawatay sa merkado publiko sa banwa sang Ivisan.
Ini ang ginpahayag ni Hon. Felipe Neri Yap, Alkalde sang Ivisan sang mainterview sang Bombo Radyo.
Suno diri, lunsay mga menor de edad ang mga suspetsado, residente man sang nasambit nga banwa kag may kaupdanan nga pangayaw.
Nakig-angut naman si Mayor sa Ivisan MPS agud pagastriktuhon ang curfew hours sa mga pamatan-on sa ila banwa.
Padayon man suno diri ang pagmonitor sa mga naulamid nga menor de edad apang indi pa ini mapasakaan sang nagakaigo nga panumbungon bangud wala may nagpabalhag nga reklamo sa kapulisan.
Ginhinyo sang Alkalde ang kooperasyon sang mga ginkawatan nga kun mahimo magpablotter sa kapulisan agud gilayon mapasakaan sang kaso ang mga kawatan kag maaksyunan.
Nagpromisa man si Mayor Yap nga pagahatagan sang bulig ang mga vendors nga ginkawatan kag mas mangin alerto pa ang kapulisan sa Ivisan kun sa diin magadeploy ang mga ini sang personel sa merkado.
