ROXAS CITY -Nagdangat na sa walo ka mga indibidwal ang nagpositibo sa COVID-19 sa banwa sang Jamindan kasunod sang pagpositibo sang dugang nga duha ka mga indibidwal nga residente sang nasambit nga banwa.
Sa interview sang Bombo Radyo kay Jamindan Mayor Mac Arthur Valdemar, ginkompirmar sini nga isa ka 30 anyos nga babayi nga residente sang Barangay Lucero nga may yara sang history of travel sa Quezon City kag Metro Manila ang nagpositibo nga LSI.
Suno kay Valdemar nga nagapabilin nga asymptomatic ang nasambit nga LSI kag ginapahayag nga ang sister-in-law ukon bayaw sini ang una naman nga nagpositibo sa amo nga balatian.
Aminado si Valdermar nga nakalagaw pa ang nasambit nga LSI bangud naglaum ini nga wala na sang balatian matapos ang 14-day home quarantine sini sa pihak nga wala pa nag-abot ang resulta sang RT-PCR test.
Samtang isa naman ka 59-anyos nga lalaki nga seafarer nga residente sang Barangay Poblacion nga may yara sang history of travel sa pungsod Singapore, Cagayan De Oro kag Metro Manila ang nagpositibo nga Returning Overseas Filipino.
Suno sa alkalde nga symptomatic ang nasambit nga ROF bangud gina-ubo ini humalin sang nag-abot sa probinsiya.
15 naman ka mga indibidwal ang natumod sa contact tracing nga naka-close contact sang nagpositibo nga LSI apang nagapabilin ang mga ini sa quarantine facility samtang ginahulat ang resulta sang RT-PCR test.
Sa karun ginpaidalum sa Enhanced Community Quarantine ang duha ka mga sitio sang Barangay Lucero nga ginpahayag ginkadtuan sang nagpositibo nga LSI.
