ROXAS CITY – Nagtaas sang 771 porsyento ang kaso sang dengue sa probinsiya sang Capiz.
Ini matapos nga naglab-ot na sa 2,177 ang mga kaso sa Capiz ba-se sa rekord sang Provincial Health Office (PHO) kag Department of Health (Capiz) sumugod Enero 1 tobtob Hunyo 29, 2019.
Nahibaluan nga pinakamadamo nga kaso nga na-rekord sa probinsiya sadtong Hunyo 23 – 29 sini nga tuig sa diin naglab-ot sa 326 ang dengue cases sa sulod lamang sang isa ka semana.
Nagtaas man sa 14 ang numero sang mga nagkalamatay sa nasambit nga sakit ba-se sa monitoring sang Enero 1 tobtob Hunyo 29.
Nagapanguna sa gihapon sa may pinakamadamo nga numero sang kaso sang dengue ang Roxas City nga may 431, ginsundan sang banwa sang Dao nga may 232 cases, Pontevedra 213, 198 sa Panay, 169 sa Tapaz, 156 sa President Roxas, 146 sa Ivisan, 94 sa Mambusao.
