Roxas City – Nagtaas sa 988 porsyento ang kaso sang dengue sa probinsiya sang Capiz.
Ba-se sa pinakauli nga record sang Provincial Health Office kag Department of Health-Capiz humalin sang Enero 1 tobtob Hulyo, 2019, nagdangat na sa 4,209 ang kaso sang dengue sa probinsya.
Nagpanguna sa gihapon sa may pinakamadamo nga kaso sang dengue ang Roxas City na may 845, ginsundan sang banwa sang Dao nga may 400 nga kaso, 341 sa Pontevedra, 302 sa Panay, 301 sa Tapaz, 270 sa President Roxas, 246 sa Ivisan kag Dumalag, 202 sa Mambusao, 197 sa Sigma, 181 sa Panit-an, 146 Jamindan, 129 Sapian, 158 Maayon, 111 Cuartero, 113 Dumarao kag 104 sa Pilar.
Suno kay Mr. Joeffrey Espiritu, Development Management Office 4 sang DOH-Capiz padayon sa gihapon ang ila adbokasiya para matapna ang balatian nga dengue.
Ginpahayag naman ni provincial administrator Dr. Edwin Monares nga nasaad sa nasambit nga executive order nga abagahon sang lokal nga gobyerno sang probinsya ang pagpabulong sa mga pasyente nga nagasuprer sang balatian nga dengue.
Nahibaluan nga sa nasambit nga numero 18 na ang napatay bangud sa dengue, sa diin mayorya nga nag-angkon sini nga balatian ang mga kabataan nga naga-edad sang 1 tobtob napulo ka tuig.
Samtang sa mga ospital sa probinsya, nagpanguna ang Roxas Memorial Provincial Hospital nga may may yara sang pinakamadamo nga mga pasyente nga nagasuprer sang dengue.
Matandaan nga gindeklara na ang dengue outbreak sa probinsiya bangud sa padayon nga pagtaas sang numero sang mga biktima sang amo nga sakit.
