Ginpabutyag sang pila ka mga mambabatas sa Mababang Kapulungan nga wala sila sang may nalapakan nga layi matapos ginpagwa sa hearing ang ginapatihan nga bank records ni Mans Carpio, bana ni Vice President Sara Duterte, may kaangtanan sa impeachment case sang Bise Presidente.
Sa preliminary investigation nga ginhiwat sa Quezon City Prosecutor’s Office, nagtambong sanday Leila de Lima, Chel Diokno kag Perci Cendaña. Suno sa ila, ang reklamo ni Carpio isa lamang ka pagpabaliskad sang isyu kag mahimo pa gani nga porma sang harassment batok sa ila.
Gin-athag man ni Cendaña nga ginahimo lamang nila ang ila obligasyon bilang mga kongresista, samtang ginpahayag ni Diokno nga indi dapat gamiton ang layi agud pahilumon ang mga opisyal nga nagaobra sang ila katungdanan.
Sa pihak nga bahin, ginpahayag sang abogado ni Mans Carpio nga nalapakan ang iya katungod sa privacy bangud ginbuyagyag sa hearing ang records halin sa Anti-Money Laundering Council ukon AMLC.
Samtang padayon ang kontrobersiya, nagaandam naman ang prosecution team sang Kamara para sa impeachment trial ni VP Sara nga nakatakda nga mag-uswag sa Senado sa Mayo 18.
