Ginsabat ni Panfilo Lacson ang mga pahayag ni Salvador Panelo may kaangtanan sa impeachment case, kag gintawag ini nga “nonsensical” ukon wala sang pulos.
Ginpabutyag man ni Lacson nga wala sang bisan sin-o ang may katungdanan nga maghambal para sa iya, kag gin-question man sini ang pagpanguna sang abogado sa desisyon sang mga senador.
Nagpamangkot pa ang senador kun ngaa ginapangunahan sila kag ginatawag nga ‘pusakal’ bisan wala pa gani nakaabot sa trial stage ang kaso.
Suno pa kay Lacson, bilang mga senator-judges, kinahanglan nga maghalong sila sa ila mga pahayag bangud ginabantayan sang publiko ang ila tagsa ka tikang.
Samtang, ini naman ang nangin sabat ni Lacson matapos ginhingadlan siya ni Panelo upod sanday Vicente Sotto III, Risa Hontiveros kag Kiko Pangilinan nga posible magboto para sa conviction ni Sara Duterte kon maglab-ot sa Senado ang impeachment case.
Ginpanindugan naman ni Lacson nga magabase sila sa ebidensya sa ila pagdesisyon bilang impeachment court judges, bangud sigurado nga husayon sang publiko kun magboto sila sang conviction bisan maluya ang ebidensya ukon mag-abswelto bisan mabaskog ini.
