Nagpahayag sang bug-os nga suporta ang pinakadaku nga political party sa Kongreso nga Lakas–Christian Muslim Democrats (Lakas–CMD) para kay President Ferdinand Marcos Jr. kag sa iya administrasyon.
Ini ang sabat sa tunga sang mga alegasyon ni anay Ako Bicol Party List Representative Zaldy Co batok sa Pangulo, nga ginatudlo niya nga amo kuno ang nag-sugosang pagsulod sang P100 bilyon sa 2025 national budget, upod pa ang mga isyu nahanungud sa nagapadayun nga imbestigasyon sa flood control anomalies.
Sa isa ka pahayag, ginpabaskug sang partido ang ila dugay na nga mga prinsipyo, lakip ang pagtahod sa rule of law, pagsunod sa due process, kag katawhayan sa kamatuoran.
Ini nga mga prinsipyo, suno sa partido, amo ang nagagabay sa ila mga tikang, sa ila mga miyembro, kag sa ila pag-atubang sa nagalutaw nga mga isyu.
Ginpanindugan sang partido nga ang ila sandigan amo ang layi, ebidensiya kag kamatuoran kag indi istorya sang kutsero ukon pulitika nga ginhimo-himo lang.
Gin-emphasize man sang partido nga ang mga alegasyon dapat ginaproseso kag sabton sa husto nga forum.
Ginsiling man sang partido nga permi nagapakita ang Pangulo sang pagpugong sa kaugalingon, pagka-abierto, kag pagtahod sa lehitimo nga proseso sang budget.
Nagpahayag man ang tanan nga miyembro sang Lakas-CMD sang ila kahandaan nga magbulig sa ano man nga legal nga imbestigasyon.
