Ginbawian sang hulam nga kabuhi ang isa ka lalaki matapos nga natumba kag nag-igo sa semento sa kilid sang karsada sang tuyo kuntani nga tapungulon ang kaupod inom sini sa Barangay Majanlud Sapian Capiz.
Ginkilala ang biktima kay alyas “Rod”, 51-anyos samtang ang ginapahayag suspek nga kainom ang ginkilala kay alyas “Jun” , 30-anyos kay lunsay residente sang nasambit nga lugar.
Sa interview sang Bombo Radyo kay PLT. Rezie Bulanon, deputy chief of police sang Sapian MPS, ginpahayag nga samtang naga-inom-inom ang biktima kag suspetsado hinali nalang nga may nagpatunga nga indi pag-intindihanay sa duha kag nagtapungulay.
Base sa ginpahayag sang hepe, bangud sa kahulugbon, nadulaan sang balanse ang biktima sang gintuyo nga sumbagon ang ginapahayag suspek apang wala ini maigo rason nga natumba ini kag naigo sa matig-a nga bagay sa kilid sang karsada ang ulo sang biktima.
Nadulaan ini sang alinto matapos nga malampos ang iya nga ulo kag madasig ini nga gintawgan sang rescuer kag ginpadangat sa malapit nga ospital apang gindeklarar ini nga dead on arrival sang doktor.
Ginklaro naman sang hepe nga indi sa sumbag sang suspek napatay ang biktima kundi sa pagkatumba sini.
Samtang, suno kay Bulanon nga nakahinun-anon naman ang magtimbang nga pamilya kag basi sa iya ihibalo nagaplano nga magsettle na lamang ini.
Sa karon, nagapabilin sa paghinakop sang Sapian MPS ang suspek para sa nagakaigo nga disposisyon.
