Wala na sang kabuhi sang ginpadangat sa ospital ang 38-anyos nga lalaki matapos ginlabo sang kaupod sini sa ilimnan sa Barangay Badiangon, President Roxas, Capiz.
Ginkilala ang biktima kay alyas “Silverio” samtang, ang ginatudlo naman nga suspek ang ginkilala kay alyas Willy, 51-anyos kag lunsay mga residente sang nasambit nga lugar.
Sa nakuha nga impormasyon sang Bombo Radyo naghikan sa President Roxas PNP, ginapahayag nga naga-inom-inom ang suspek kag biktima, kaupod si alyas “Mike” apang, matapos ang pag inom-inom sang makahulubog nga ilimnon, may nagluntad nga mainit nga pagbinaisay sa tunga sang suspek kag ni alyas mike.
Magatambag lang kuntani sa ila ang biktima apang, hinali nalang ini nga ginlabo sang suspek.
Bangud sini, nag-angkon sang patal nga pilas sa magkatuhay nga parte sang lawas ang biktima nga gintunaan sang iya kamatayon.
Boluntaryo naman nga nagsungka sa talatapan ni Mayor Receliste Escolin ang suspek kag gin-turn-over sa nagresponde nga mga kapulisan.
Sa karon, nakahunong na sa karsel sang President Roxas MPS ang suspetsado para sa nagakaigo nga disposisyon.
