Sa baylo nga clearance, arrest warrant ang nabaton sang isa ka lalaki nga nagpadulong sa National Bureau of Investigation (NBI) sa Iligan City sang mahibaluan nga wanted siya sa kaso nga rape kag 15 ka tuig na nga ginapangita.
Suno sa NBI, nagkadto ang suspek sa NBI-Iligan District Office agud kuntani magkuha sang clearance.
Apang sang magpatigayon sang pag-usisa, nadikubrehan nga may yara siya sang derogatory record may kaangtanan sa kaso nga rape kag may nakabutang nga “wanted”.
Natukiban ang iya kaso sa ginpatigayon nga standard quality control, verification kag evaluation.
Pahayag sang NBI, nagsanto ang mga detalye sa record, lakip na ang pangalan, criminal case number, mga kaso nga gin-file, korte nga nagpaguwa sang warrant kag address nga nakasulat sa warrant of arrest nga ginpaguwa sang Regional Trial Court, Branch 80.
Gin-ako man sang lalaki nga may yara sang kaso apang nagdumdom ini nga natapos na.
Gani sa baylo nga clearance, arrest warrant ang ginserbe sa iya sang mga personnel sang NBI.
