ROXAS CITY – Anay na nga na na-implementaran sang search warrant kag nakuhaan sang armas luthang kag anay man nga drug surrenderee ang lalaki nga nasapwan patay sa circumferential road, Barangay Dayao, Roxas City kaina sang kaaganhon.
Mahibaluan nga ang biktima ang ginkilala kay Sandy Dela Cruz Silverio 50-anyos kag residente sang sang Purok III, Barangay Libas sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga nakit-an sang isa ka komprador sang isda ang biktima nga nagakulob sa gutter sa higad sang dalan kag may mga pilas tuga sang pagpangluthang.
Mahibaluan nga nag-angkon sang pilas ang biktima sa wala sini nga liog, abaga, dughan, kag balikawang.
Gintinguhaan pa nga ginpadangat sa Roxas Memorial Provincial Hospital ang biktima, apang gindeklarar ini nga dead on arrival sang doctor.
Narekober sang mga kapulisan sa lugar ang 5 tanan ka basiyo sang bala .45 caliber, drug paraphernalia’s, P35.00 kag mga yabe.
Sa karun, padayon pa nga ginahibalo sang mga kapulisan kun anu ang motibo sa nasambit nga insidente.
