CUARTERO CAPIZ -Pilason ang isa ka lalaki matapos madisgrasya samtang nagabiyahe sakay sa iya motorsiklo sa national road sang Poblacion Takas, Cuartero, Capiz, pasado alas 8:00 sang gab-i, Sabado, Agosto 16.
Ang biktima amo si alyas “Jhon”, 31-anyos, residente sang Barangay Bantud, Dumangas, Iloilo.
Base sa imbestigasyon sang Cuartero Municipal Police Station, nagikan ang motorsiklo sa Iloilo kag padulong kuntani sa Aklan. Apang Pag-abot sa lugar sang Poblacion Takas, ginapatihan nga nadulaan sang kontrol si Jhon sa pagmaneho, rason nga ini ang naaksidente.
Gilayon nga nagresponde ang mga katapo sang Cuartero Emergency Response Unit kag ginbuligan ang biktima.
Nag-angkon sang pilas sa nagkalain-lain nga parte sang lawas. Apang nagpamalibad ini nga dal-on sa ospital.
Sa karon, yara sa kustodiya sang Cuartero Municipal Police Station ang motorsiklo para sa nagakaigo nga disposisyon.
